EnClaveMorada, formado por las profesoras Belén Ferreiro, Rebeca Carrera y Susana Pérez Otero (socia de AMM y autora del blog Músicas y Silencios) del Conservatorio Profesional de Música de Vigo, han organizado toda una serie de actividades que resumimos a continuación:

EnClave Morada é o nome que nos puxemos Susana Pérez, Belén Ferreiro e Rebeca Carrera para autodenominarnos como colectivo. Este ano, ademais da instalación Mulleres que compuxeron para… que está ao lado da sala de profesorado e do concerto Unha tarde entre mulleres, preparamos un montón de actividades para a primeira semana de marzo.

Semana da Igualdade no Cmus Profesional de Vigo. A celebrar entre 1 ao 8 de marzo, pretende conmemorar o día da muller e ao mesmo tempo visibilizar a aquelas que tiveron un papel destacado no ámbito da música. As actividades que este ano conforman o proxecto son as seguintes:

• Venres 1/03 Música de compositoras mallorquinas: O profesor Joan Ciría dará unha conferencia e un pequeno concerto sobre mulleres e música de Mallorca. Centrarase en mulleres nacidas antes de 1925 (compositoras, docentes, concertistas, etc.) para a conferencia con soporte de vídeo e para o concerto (no que tamén intervirá profesorado do centro) escolléronse varias obras de compositoras mallorquinas que el coas súas investigacións recuperou do esquecemento.

• Luns 04/03 Músicas e silencios: Concerto divulgativo ofrecido por Susana P. Otero (piano) e Oscar Rodríguez Calvo (contrabaixo). O recital Músicas e Silencios pretende ser unha proposta orixinal con varias reivindicacións históricas: por unha banda, a presentación dun instrumento como o contrabaixo, moi pouco empregado como solista en concertos e do que se cre falsamente, como amosaremos, cun repertorio moi limitado; por outra banda, a de contribuir a superar a exclusión das mulleres como compositoras na programación de obras para contrabaixo e piano. O recital conta cunha breve introdución, proxección de imaxes e a presentación e interpretación de obras das compositoras Gloria R. Gil, Sonia Megías, Alicia de Larrocha, Nadia Boulanguer, Florence B. Price e Ellen Taaffe Zwilich.

• 5/03 Homenaxe a Dorothé Schubarth: O coñecemento sobre o traballo desta muller recentemente falecida é imprescindible no estudo da música tradicional galega, especialmente falando da música vocal. Está confirmada a asistencia de Concha Losada e Antón Santamarina. Concha é a actual presidenta do Museo do Pobo Galego, institución onde está depositado a día de hoxe o legado Schubarth con respecto a Galicia. Antón Santamarina é coautor do Cancioneiro Popular Galego, especialista na parte lingüística do mesmo e persoa fundamental na súa publicación pola Fundación Barrié. A nivel musical teremos dúas propostas ben distintas partindo de material recollido no cancioneiro: por unha parte o alumnado das materias Optativas de Produción, Jazz e Banda Jazz e por outra parte o grupo de pandereteiras As Lagharteiras. Ambas partes farán a súa propia versión de temas recollidos no cancioneiro.

• 06/03 Unha Tarde entre Mulleres: Será a II edición deste macroconcerto que seguirá os mesmos pasos que o curso pasado a nivel organizativo. Comenzará ás 16:00h no auditorio David Russell e a totalidade do programa musical a interpretar por alumnado e profesorado estará formado por obras compostas por mulleres. Para evitar un concerto excesivamente pesado que se faga interminable para participantes e público, organizaranse convocatorias cada 50/60 minutos, de maneira que tanto asistentes como participantes teñan a oportunidade de entrar e sair libremente. Intercalaranse tamén proxeccións de audio e vídeo realizadas polo alumnado do centro. Máis que un concerto, pretende ser un punto de encontro e de visibilización. E haberá sorpresas…

• 07/03 Homenaxe a Alicia de Larrocha: Ademais da súa faceta como intérprete internacionalmente recoñecida, Alicia de Larrocha ten composicións para piano realizadas na súa etapa de xuventude. O curso pasado o Cmus Profesional de Vigo mercou parte da súa obra compositiva (xa está dispoñible para préstamo na biblioteca do centro). Pretendemos mercar os volumes que faltan  e realizar un concerto homenaxe á súa figura interpretando a súa obra. Xa está confirmada a asistencia da súa filla, Alicia Torra de Larrocha,  quen se encarga actualmente do seu legado.

• 08/03 Matria: Proxección da película “Matria”, e posterior análise, coloquio e concerto. Contaremos coa presenza do director Álvaro Gago, da compositora da música da película Patricia Cadaveira (profesora do centro na especialidade de saxofón) e cunha das intérpretes, Nerea Rodríguez (profesora tamén do centro na especialidade de acordeón). Participará tamén activamente o alumnado das optativas música e cine e Saídas laborais da música.

• Durante o mes de marzo – Escape Room: Compositoras engaioladas: O alumnado da materia de Itinerario-Musicoloxía encargouse de converter a biblioteca do centro nunha Scape room. Unha compositora foi secuestrada e soamente poderá ser liberada se alguén resolve as 9 probas que conforman a Escape Room. Voluntariamente entrará o alumnado en grupos de 4 ou 5 persoas (a partir de 4º de grao profesional), que empregando grandes doses de enxeño, cálculo matemático, investigación, coñecementos musicais, etc. serán quen de atopar pistas para desvelar o misterio. Trátase de achegar un ambiente lúdico á biblioteca, dinamizala e transversalmente traballar contidos relacionados coa composición musical por parte de mulleres. Poderán apuntarse na biblioteca onde poderán ver os horarios dispoñibles.